បន្ទាយមានជ័យ៖ រដ្ឋបាលខេត្តបន្ទាយមានជ័យគ្រោងរៀបចំភ្នំកងវ៉ា ដែលជាភ្នំមួយដែលមានទេសភាពស្រស់បំព្រង រៀបចំឱ្យក្លាយទៅជារមណីយដ្ឋានបែបធម្មជាតិ ដោយមានការដាំកូនឈើគ្រប់ប្រភេទនៅជុំវិញភ្នំ ដើម្បីទាក់ទាញទេសចរចូលមកទស្សនា លេងកម្សាន្ត ឬធ្វើបុណ្យទានផ្សេងៗ។

តាមការបញ្ជាក់ពីលោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ក្នុងឱកាសអបអរសាទរបុណ្យរុក្ខទិវា ៩ កក្កដា ឆ្នាំ២០២៣ ដែលប្រារព្ធធ្វើនៅបរិវេណវត្តកងវ៉ា ស្ថិតក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ នាព្រឹកថ្ងៃទី០៩ ខែសីហា ឆ្នាំ២០២៣ ដែលរៀបចំឡើងដោយរដ្ឋបាលខេត្ត និងមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមាយជ័យ។

លោក អ៊ុំ រាត្រី ក៏បានលើកឡើងថា នៅក្នុងក្រុងសិរីសោភ័ណ មានភ្នំជាច្រើន ប៉ុន្តែជាជំហានដំបូងខេត្តនឹងធ្វើការជ្រើសនៅភ្នំកងវ៉ានេះ ដើម្បីរៀបចំទៅជារមណីយដ្ឋានតាមបែបធម្មជាតិ។ អភិបាលខេត្តបន្ទាយមានជ័យ ក៏បានបញ្ជាក់ថា អាជ្ញាធរក្រុង ក៏នឹងមានការរៀបចំនូវកម្មវិធីមួយ ចំពោះគូស្វាមីភរិយាថ្មី ដែលទើបរៀបការ ចូលរួមដាំកូនឈើឱ្យបានម្នាក់មួយដើម ទុកជាអនុស្សាវរីយ៍ ក៏ដូចជាការលើកកម្ពស់បរិស្ថាន ស្រឡាញ់ព្រៃឈើធម្មជាតិ។

ជាមួយគ្នានោះលោក អ៊ុំ រាត្រី បានអំពាវនាវដល់ប្រជាពលរដ្ឋរស់នៅទូទាំងខេត្ត ក៏ដូចជាមន្ត្រីរាជការ សិស្សានុសិស្សចូលរួមដាំកូនឈើបានច្រើន ដើម្បីជាប្រយោជន៍ដល់ប្រជាជន សហគមន៍ ក៏ដូចជាជម្រកសត្វព្រៃ។ លោកអភិបាលខេត្តបានលើកឡើងថា៖ «មួយវិញទៀតកាលណាមានព្រៃឈើច្រើនជួយទប់ស្កាត់នូវគ្រោះធម្មជាតិផ្សេងៗ ហើយប្រជាពលរដ្ឋក៏ទទួលបានផលប្រយោជន៍ពីព្រៃឈើផងដែរ»៕